Penyiar Radio

Saben dina sakdurunge mangkat sekolah, aku nyetel radio.  Mung pengin ngrungokake suwarane Santi. Penyiar radio Mentari kang suwarane tansah nggodha ati. Pokoke saben esukku saiki dadi nyenengake.“Isih karo Santi ana ing progam Wilu­jeng Enjing…. Sing arep sekolah utawa nyambut gawe ngati-ati ing dalan ya… aja nganti kesandhung…” ujare Santi se­mu ngguyoni.Bengine uga ora tau keri aku ngru­ngokake suwarane Santi anggone siaran kanthi program “Serat Tresna.” Aku nganti lila ninggalna acara TV sing isine joget-joget kuwi. Serat Tresna, iku lho program sing maca surat saka pengirim kanggo wong sing dituju. Dhuh, aku ya ngirim terus, nanging ora tak wenehi tujuan kang jelas surat iku kanggo sapa. Mangka satemene ya kanggo Santi dhewe he he . . .***“Aja kesupen ndherek lomba foto narsis sing hadiahe dhahar dalu bareng salah sijine penyiar Mentari,” unine iklan ing radio Mentari mau. Wih… dhahar dalu bareng penyiar? Wah… iki kesem­patanku kanggo ketemu Santi. Aku ku­du melu lomba iki!Tak semak maneh carane melu lom­ba kuwi, “Carane gampang. Upload foto narsismu ing facebook Radio Mentari. Sapa sing entuk like paling akeh bakal menang. Bakal ana wong telu kang en­tuk kesempatan dhahar dalu kaliyan pe­nyiar Mentari.”Carane gampang. Tapi koyoke kudu usaha gedhe iki, batinku. Mangka kancafacebook-ku lagi ana wong 200 an.Mulih sekolah, aku langsung me­nyang studio foto. Foto narsisku hasile kudu maksimal, supaya akeh sing nge-like mengkone. Ora apa-apa ngetokake dhuwit rada akeh, sing penting bisa ketemu Santi.“Mas, hasile sampean gawe sing jos,” ujarku marang mas fotografer. Mase mau mung menehi jempol ta­ngane, “Sip.”Aku foto ping pindho, ganti busana ping pindho uga. Sing pertama, nganggo kaos kuning lan jaket jeans. Busana kang kaping pindho rada formal, hem lengen dawa werna abang ati dilebokake sak clana jeans. Sepatune tetep, moccasin. Wis mantep pokoke, nek nganti ora ana sing nge-like ya kebangeten! Wong nggan­thenge kaya ngene kok!“Njaluk file fotone bae, lebokke nyang flashdisk-ku, Mas” kandhaku ma­rang mas fotografer mau sinambi me­neh­ake flashdisk rong giga-ku.Tekan omah banjur tak upload lan langsung promosi fotoku marang kanca-kancaku ing facebook supaya gelem menehi like marang fotoku kuwi.Jelas bakal menang aku mengko, lan sing tak pilih kanggo kanca dhahar dalu mesthi wae Santi, penyiar favoritku, ba­tinku manteppp!***Saben dina tak cek foto-foto ing face­book-ke radio Mentari. Ngecek siji-siji jumlahlike foto-foto mau, lan ora ke­tinggalan fotoku dewe.Dhuh, pranyata rada angel. Sebab sa­ingane uakeeh banget. Aku promosi meneh marang kanca-kanca lewat inbox supaya gelem nge-like, kanggone sing durung nge-like. Ora cukup semono, aku uga gawe facebook maneh, golek kanca maneh, lan promosi maneh. Pokoke aku pengin menang, aku pengin ketemu San­ti. Supaya bisa ngerti rupane, lan kena­lan langsung marang penyiar pujaan kuwi.Aku terus promosi foto nganti sewu­lan lan nganti bates lombane entek.***Ing ngarepku wis ana lilin kang uripe cilik. Genine mobat-mabit kena angin. Jarene ngene iki sing jenenge candles love. Ing sisih pang­gonanku lungguh malah ana kolam renange kang endah, kanthi efek cahaya werna biru, ora lali uga akeh lilin kang kemambang ing banyu. Puih endaa…h banget. Ora nggu­munake iki pancen pesta makan malam kang istimewa. Lan aku dadi salah siji tamu agunge.Mejaku cedhak karo meja pemenang liyane. Aku entuk juara siji, lan pilihan teman makanku tetep kaya sing wis tak tulis nalika ndhaftar ndhisik, Santi!Ana wong wadon loro mlaku menyang arah mejaku. Ke­karone nganggo jarik putih kang endah. “Sapa kuwi?” takokku marang awakku dewe, “Geneya sing kiwa ndadak digan­dheng barang? O… sajake wuta,” batinku maneh.Wong wadon loro mau mandheg ing ngarep mejaku. Wong wadon sing sisih tengen kuwi banjur ngomong; “Niki Mbak Santi mase ingkang badhe dhahar sesarengan kalih mase.”Blaik! Awakku sakala kaya kesetrum listrik. Bener iki Santi penyiar favoritku? Aku mati lungguh sedhela. Lagi ngerti aku, Santi kuwi pranyata penyiar tuna netra. Nanging aku dadi saya kagum marang dheweke. Ora salah anggonku favorit marang Santi…. **

http://www.panjebarsemangat.co.id/penyiar-radio