Sikat Gigi Bisa Dadi Susuh Bakteri

Sikat gigi (sigi) disumurupi dadi salah siji srana kang nyebabake lara untu lan gusi. Jalaran ing sikat gigi kang katon resik lan garing kuwi pranyata tumem­pel bakteri luwih saka sayuta kang asi­pat patogen. Apamaneh kahanane sigi kuwi lembap bisa njalari tumang­kare bakteri kanthi cepet.

Milih sikat gigi (sigi) dudu perkara kang gampang. Saliyane ngresiki untu lan nyegah penyakit, pranyata sigi dadi salah siji panggonan kang trep marang tumangkare bakteri kang bisa ndadekake lara untu lan gusi. Jalarane ing sigi kang katone resik sajak tumempel bakteri luwih saka sayuta.

Bakteri-bakteri kasebut, utamane kang asipat patogen, nye­bab­ake sakehing penyakit. Bakteri kang tumempel ing sigi asale saka proses transfer ing growongan cangkem (rongga mulut), ditambah klawan bakteri kang ana ing sakiwa tengene, lan tam­bah nemen maneh amarga faktor kelembapan kang ngrikatake tuwuhe bakteri kuwi.

“Saka sigi siji bisa tuwuh mawarna-warna penyakit. Wiwit saka bau mulut, rusake untu (karies), kelainan marang sakiwa tengene untu lan jaringan liyane sing nyangga untu, engga pe­nyakit sariawan kang angel warase,” pratelane Prof Dr drg Melanie S Djamil M Biomed FICD Lab BioCORE saka Fakultas Kedokteran Gigi Universitas Trisakti ing sawijining adicara ing Jakarta mentas iki.

Melanie nambahake, kegiyatan nyikat untu, biyasane njalari tuwuhe bakteri ing ngendi-endi, wiwit saka growongan cang­kem, banyu, hawa, lan sikat gigi utamane ing wulu-wulune sikat.

Bakteri asale uga bisa saka banyu kang digunakake, kang bisa ngrembaka lan mbentuk klompok. Iki kang dadi sebabe kita kerep nandhang lara sariawan, radhang gusi, utawa penyakit untu liyane sanajan wis sregep sikatan. “Bakteri sing ana ing sigi, bisa pindhah menyang growongan cangkem nalika sikatan, mangkono uga kosok baline. Dadi, nulare bisa wolak-walik,” ujare.

Sawatara conto bakteri sing kerep pindhah-pindhah lan bisa tumempel ing sigi, Melanie nyabutake, ing antarane yaiku jamur, kolera, baksil tifus, Staphylococcus aureus lan Enterohemorr-hagie-coli. “Apamaneh bakteri cepet ngrembaka ing papan ka­remane, lembab, asam, lan teles slaras karo kahanane jedhing nalika sikatan,” tandhese.

Melanie nambahake maneh, bakteri siji ing itungan dhetik wae bisa enggal ngalamimultiplikasi lan nak-tumanak.

Mula saka iku, Melanie aweh pratikel, wigati tumrap kita ngrumat apa kang ngupakara kita, klebu sigi sabubare digu­nakake. Saora-orane piranti kang gawe bakteri kasebut cepet tumangkar, yaiku kahanan kang lembab.

Pangrumatan kang bisa ditindakake mungguhing sikat gigi kang bubar digunakake, kaya ta tansah ngresiki sisa-sisane banyu klawan cara dikipat-kipatake utawa klawan migunakake tisu utawa lap khusus supaya sikat gigi kuwi enggal garing.

Nanging, kadhang-kadhang kita ora duwe wektu kanggo nggaring­ake, iklim tropis Indonesia klawan kelembapan hawa kang dhu­wur sajake kita kangelan ndadekake sigi bisa tansah ing kahanan garing.

Carane milih sigi

Nggatekake growongane cangkem. Yen kita nduweni susu­nan untu lan growongan cangkem ciut, becike milih sikat sing ukuran cilik. Mangkono uga kosok baline. Kegedhen sikat utawa keciliken ndadekake panggonan sing rupek angel dijangko. Endhas sikat sing cilik bisa digunakake kanthi becik ing njero growongan cangkem. Tumrap wong diwasa, dawane endhas sikat 2,5 cm, dene kanggone bocah cilik cukup 1,5 cm.

Dawane wulu sikat uga kudu digatekake. Sikat gigi klawan wulu sing dawane ora padha ora bisa ngresiki papan sing rata kanthi becik. Wulu sikat aja kelemesen utawa kekakon. Wulu sikat sing kelemesen ora bisa ngresiki plak untu kanthi sampurna. Dene wulu sikat sing kekakon bisa ngrusak jaringan.

Yen kepengin tuku sigi sing dipepaki nganggo tutup sikat, becike milih sing tutupe ana bolongane. Yen ora, sikat bakal kanggo papan ngrembakane bakteri amarga lembap. Milih sikat sing gagange dirancang ora gampang selip saengga ora mletha-mletho nyogrok gusi nalika digunakake. (KS)

http://www.panjebarsemangat.co.id/sikat-gigi-bisa-dadi-susuh-bakteri